काठमाडौँ । नेपाल कृषि अनुसन्धान परिषद् (नार्क) का वैज्ञानिकले वर्षाका कारण यस पटक धान उत्पादनमा वृद्धि हुने अनुमान गरेका छन् । आगामी मनसुनमा सरदरभन्दा बढी वर्षा हुने अनुमान जल तथा मौसम विज्ञान विभागले गरेको छ । पर्याप्त पानी पर्यो भने धानको उत्पादनमा वृद्धि हुने धानका वैज्ञानिक रामवरण यादवले बताए । धान खेतीका लागि २५ सय मिलिलिटर पानी आवश्यक पर्ने गरेको बताउँदै उनले कतिपय ठाउँमा क्षेत्रमा औसत करिब नौ सय मिलिलिटर पानी पर्छ तर १५ सय मिलिलिटरभन्दा बढी पानी पर्यो भने धानका लागि राम्रो हुने गरेको बताए ।
औषतमा १५ सय मिलिलिटर पानी बढी पानी पर्ने सम्भावना रहेको उनले बताए । नेपाल कृषि अनुसन्धान परिषद् (नार्क) अन्तर्गतको राष्ट्रिय कृषि वातावरण अनुसन्धान केन्द्रका प्रमुख डा.ध्रुवराज भट्टराईले विभिन्न रिपोर्ट हेर्दा यस पटकको मनसुनमा सरदरभन्दा बढी पानी पर्ने भएकाले धान उत्पादनमा वृद्धि हुने अनुमान गर्न सकिने बताए । तर सबैतिर एकैनासको पानी नपर्ने भएकाले कतै खडेरी र कतै धान उत्पादन हुने सम्भावना देखिएको बताए । नेपालमा कहिल्यै पनि एकनासले पानी परेको छैन, कतै धेरै पानी त कतै सुक्खा हुने गरेको देखिएको छ तर यस पटक औसतमा सबैतिर राम्रै पानी पर्ने अनुमान गरिएको उनले बताए । सुदूरपश्चिम प्रदेशको उत्तरीपश्चिम भूभाग, बागमती प्रदेशको दक्षिणपूर्वी भूभाग, मधेश प्रदेशको मध्य भूभाग र कोशी प्रदेशको मध्य तथा मध्यपश्चिम भूभागमा सरदरभन्दा बढी वर्षा हुने अनुमान गरिएको उनले बताए ।
