बागमती । नेपाली कांग्रेसले बागमती प्रदेशका मुख्यमन्त्री शालिकराम जम्कट्टेललाई पदबाट राजीनामा दिन आग्रह गरेको छ । बिहीबार कांग्रेस बागमती संसदीय दलका नेता बहादुरसिंह लामाले विज्ञप्ति जारी गरी मुख्यमन्त्री जम्कट्टेललाई राजीनामा दिइ सरकार गठनका लागि मार्गप्रशस्त गर्न आग्रह गरेका हुन् ।
विज्ञप्तिमा केन्द्रमा एमाले र कांग्रेसको सहमतिको सरकारको प्रक्रिया सुरु भइसकेको उल्लेख गर्दै माओवादी केन्द्रको नेतृत्वमा रहेको बागमती सरकारलाई नयाँ सरकार गठनका लागि बाटो खुलाउन आग्रह गरिएको छ ।
विज्ञप्तिमा भनिएको छ, ‘माओवादी नेतृत्वको बागमती सरकारलाई एमालेका मन्त्रीहरुले राजीनामा दिएर सरकारलाई दिएको समर्थन समेत फिर्ता लिँदै राजीनामाको माग गरिसकेको अवस्था छ । यो अवस्थामा सरकारले कुनै पनि महत्त्वपूर्ण निर्णय, नियुक्ति र त्यस प्रकृतिको अन्य कार्यहरू गर्नु नैतिकताको हिसाबले पनि उपयुक्त नहुने भएकोले नेपाली कांग्रेस संसदीय दलको तर्फबाट गम्भीर ध्यानाकर्षण गराउँदै माननीय मुख्यमन्त्रीले राजनीतिलाई सहज रूपमा अगाडि बढाउन र सहमतीय सरकार गठन गर्न तत्काल मार्गप्रशस्त गरिदिनुहुन आग्रह गदर्छु।’
सत्ताघटक नेकपा एमालेले सरकारलाई दिएको समर्थन फिर्ता लिँदै मन्त्रीहरुले राजीनामा दिएपनि मुख्यमन्त्री जम्कट्टेलले राजीनामा दिएका छैनन् । मुख्यमन्त्री जम्कट्टेल पनि केन्द्रमा प्रचण्डले जस्तै विश्वासको मत लिने तयारीमा रहेको बताइन्छ ।
