सुदूरपश्चिम । नेकपा एमालेका महासचिव शंकर पोखरेलले राष्ट्रिय स्वतन्त्र पार्टीका सभापति रवि लामिछानेले सहकारी प्रकरणमा ‘क्लिन चिट’ पाएको भन्दै भ्रम फैलाएको बताएका छन् ।
बुधबार कैलालीको धनगढीमा प्रेस चौतारीले गरेको पत्रकार सम्मेलनमा महासचिव पोखरेलले कानुनी प्रक्रियामा गएर अदालतबाट सफाइ पाएपछि मात्र ‘क्लिन चिट’ पाइने बताए ।
उनले संसदीय छानबिन विशेष समितिले कानुनअनुसार कारबाही गर्नु भनेको भन्दै त्यसलाई ‘क्लिन चिट’को संज्ञा दिएर भ्रम फैलाइएको र सहकारी प्रकरणको अनुसन्धान नै अवरुद्ध गर्न खोजेको आरोप लगाए ।
उनले भने, ‘कानुनी राज्यमाथिको उपहास हुने गरी अनुसन्धानलाई नै रोक्ने गरी गतिविधि भइरहेको छ ।’ उनले कुनै पनि राजनीतिक दल र त्यसको नेतृत्वले अभियोग लागेपछि अनुसन्धानमा सहयोग गर्नुपर्ने भन्दै त्यसबाट भाग्नु उचित नभएको बताए ।
उनले भने, ‘राष्ट्रिय स्वतन्त्र पार्टी र त्यसका सभापतिले निःसर्त रुपमा अनुसन्धानमा सहयोग गर्नुपर्छ । अभियोग कति गम्भीर छ भन्ने विषय राष्ट्रिय स्वतन्त्र पार्टी र त्यसका नेताकार्यकर्ताहरुले बुझ्नु भएको छ होला ।’
महासचिव पोखरेलले सरकारबाट बाहिरिएपछि माओवादी केन्द्रका अध्यक्ष प्रचण्डमा छटपटी देखिएको बताए । उनले भने, ‘नयाँ सरकार गठन भएको सय दिन नपुग्दै उहाँको छटपटी संसदमा देखिएको थियो । प्रचण्डले संसदमा दिएको अभिव्यक्ति असंसदीय र अराजनीतिक थियो । माओवादी द्वन्द्वकालमा भएको हिंसाको आलोचना गर्दा संसद रोक्ने काम हुनु गलत हो ।’
