काठमाडौँ । प्रधानमन्त्री बालेन्द्र शाहको अभिव्यक्तिप्रति आपत्ति जनाउँदै प्रतिनिधिसभा बैठकमा प्रतिपक्षी दलहरूले अवरोध कायमै राखेका छन् ।
सभाको आजको बैठक शुरु भए लगत्तै प्रतिपक्षी दलका सबै सांसदहरू उठेर विरोध शुरु गरे ।
बैठकमा प्रतिपक्षी दलका सांसदहरुले अवरोध शुरु गरेपछि सभामुख डोलप्रसाद अर्यालले सीमा विवादबारे विपक्षी दलहरूले उठाएका विषयमा सरकार गम्भीर रहेको विश्वास व्यक्त गरेका थिए ।
सभामुख अर्यालले विगत केही दिनदेखि सदन स्थगित भइरहेको, सदनमा उठिरहेको विषयमा आफ्नो ध्यानाकर्षण भएको र सत्तापक्षबाट प्रतिपक्षी दलसँग संवाद भइरहेको पनि बताए ।
उहाँले प्रतिपक्षीले उठाएका विषयमा सरकार पनि गम्भीर रहेको विश्वास रहेको भन्दै बैठकको कार्यसूची अगाडि बढाउन प्रतिपक्षी दलका सांसदहरूलाई आग्रह गरे ।
बैठकमा नेकपा एमाले संसदीय दलका उपनेता पद्मा अर्यालले प्रधानमन्त्री शाहले कूटनीतिक मर्यादा र पदीय जिम्मेवारी उल्लङ्घन गर्दै अभिव्यक्ति दिएको भन्दै भुल सुधार गर्नुपर्ने र क्षमा माग्नै पर्ने अडान राखे ।
एमाले संसदीय दलका उपनेता अर्याल र राष्ट्रिय प्रजातन्त्र पार्टीका संसदीय दलका नेता ज्ञानबहादुर शाहीले आर्थिक विधेयकमा अर्थ मन्त्रालयले गरेको करको दर हेरफेरको विषय सरकारको ध्यानाकर्षण गराए ।
सांसदहरूले संसदमा दर्ता भएको आर्थिक विधेयकको १६ पृष्ठ गायब भएको, करका दर हेरफेर भएको भन्दै यो काम कसरी भयो र चुहावट कसरी भयो भन्ने विषयमा प्रश्न गरे ।
सांसद शाहीले करका दर हेरफेर हुन लागेको विषय चुहावट हुनु सामान्य विषय नभएको भन्दै अर्थमन्त्री डा। स्वर्णिम वाग्लेमाथि संसदीय छानबिन हुनुपर्ने बताए ।
बैठकमा प्रतिपक्षी दलका सांसदहरूलाई बैठकलाई कार्यसूचीमा प्रवेश गराउन सहयोग गर्न पटक पटक आग्रह गर्दा पनि प्रतिपक्षी दलका सांसदहरु उठेर विरोध जारी राखेपछि सभामुख अर्यालले बैठक आजै १५ मिनेटका लागि स्थगित गरेका हुन् ।
