काठमाडौं । नेपाल विद्युत प्राधिकरणका कार्यकारी निर्देशक कुलमान घिसिङले प्राधिकरण टाट पल्टिन लाग्यो भनेर हल्ला फैलाइएको भन्दै आपत्ति जनाएका छन् ।
दोस्रो कार्यकालको तीन वर्ष पूरा भएको अवसरमा शुक्रबार पत्रकार सम्मेलन गरी घिसिङले प्राधिकरण नाफामा रहेकाले त्यो हल्लाको पछि नलाग्न आग्रह गरे । उनले प्राधिकरणको नाफा कागजी नभएको बताए । उनले प्राधिकरणसँग एक खर्ब रुपैयाँ लगानीयोग्य रकम रहेको बताए ।
घिसिङले विगत ८ वर्षमा प्राधिकरणले आफ्ना सहायक र सम्बद्ध कम्पनीहरूमा ५६ अर्ब ६८ करोड रुपैयाँभन्दा बढी लगानी गरेको समेत जानकारी दिए ।
उनले प्राधिकरणको कुल सम्पत्ति ८ वर्षअघि २ खर्ब ११ अर्ब रुपैयाँ रहेकोमा हाल ६ खर्ब ३२ अर्ब रुपैयाँ पुगेको जानकारी दिए । उनेल तीन वर्षमा महसुल दर २५ प्रतिशत घटाइएको तर नाफामा बढोत्तरी भएको बताए । घिसिङले महालेखापरीक्षक र प्राधिकरणकै तीन जना आन्तरिक लेखापरीक्षकले बनाएको हिसाब कसरी खोट हुनसक्छ भन्दै प्रश्न गरे ।
उनले यो नेपालको जलविद्युत् विकासका लागि कोसेढुंगा र महत्त्वपूर्ण प्रस्थानविन्दु भएको उनले बताए । देशभित्र खपत गरी अतिरिक्त भएको विद्युत् भारतीय प्रतिस्पर्धी बजारको डे–अहेड र रियल टाइम मार्केट र मध्यकालीन सम्झौताबमोजिम पनि विद्युत् निर्यात भइरहेको उनले जनाए ।
उनले भने,’विद्युत् निर्यात परिमाण हरेक वर्ष बढिरहेका छ । नेपालले औपचारिकरूपमा विद्युत् निर्यात नोभेम्बर २०२१ बाट सुरु गरेको थियो । निर्यातको मात्रा बढ्दै गएर गत आर्थिक वर्षमा एक अर्ब ९४ करोड युनिट विद्युत् निर्यात गरी १७ अर्ब ७ करोड रुपैयाँ आम्दानी भएको छ ।’
देशभरि रहेको जग्गाहरूको यकिन गरी प्राधिकरणको करिब ४० हजार २ सय रोपनी जग्गाको पहिचान भएको पनि घिसिङले जानकारी दिए । गतवर्ष मात्र काठमाडौं उपत्यका भित्रको करिब ७२ रोपनी १२ आना जग्गाको पुर्जा प्राप्त भएको घिसिङले बताए ।
उनले अब देश छिट्टै पूर्णरुपमा विद्युतीकरण हुने दाबी गरे । उनले यसका लागि विकट बस्तीहरूको पहिचान गरेर बाँकी विद्युतीकरणको कार्य अघि बढिसकेको बताए । उनले तीन वर्षको अवधिमा विद्युतीकरणमा उल्लेख्य उपलब्धी हाँसिल गर्न सफल भएको बताए ।
उनले भने, ‘तीन वर्षअघि ८९ प्रतिशत रहेको विद्युतीकरण अहिले ९९ प्रतिशतमा पुगेको छ।’ आठ वर्षअघि २९ लाख ७० हजार रहेका विद्युतको ग्राहकको संख्या हाल बढेर सामुदायिकसहित ६० लाख ३५ हजार पुगेको उनले बताए।
घिसिङले विद्युतीकरणका लागि प्राधिकरणको आफ्नो स्रोतबाट ठूलो लगानी भएको बताउँदै सुकुमबासी बस्ती, चेपाङ, मुसहरलगायत विपन्न वर्गका घरपरिवारमा बिजुली पुर्याउन निःशुल्क मिटर वितरण गरिएको जानकारी गराए। उनले प्राधिकरणले अब पुँजीको १० प्रतिशत सर्वसाधारणका लागि शेयर निष्कासनको कार्य अघि बढाएको जानकारी दिए ।
