काठमाडौँ । नेकपा माओवादी केन्द्रका अध्यक्ष पुष्पकमल दाहाल प्रचण्डले राष्ट्रिय स्वतन्त्र पार्टीका सभापति रवि लामिछाने पक्राउ पर्न सक्ने बताएका छन् ।
शुक्रबार विपक्षी दलहरुको बैठकमा अध्यक्ष प्रचण्डले रास्वपाका सभापति लामिछानेलाई पक्राउ गर्न लागिएकोबारे आफूले सूचना पाएको बताएका हुन् । विपक्षी दलको बैठकमा अध्यक्ष प्रचण्डले बिहीबारको तीन दलको बैठकबाट रवि पक्राउ पर्ने सूचना पाएको उल्लेख गरेका हुन् ।
बिहीबार कांग्रेस, एमाले र माओवादीबीच शान्ति प्रक्रियाका बाँकी काम टुंग्याउन छिटो काम अघि बढाउने विषयमा छलफल भएको थियो ।
बैठकपछि नेकपा एकीकृत समाजवादीका उपाध्यक्ष राजेन्द्र पाण्डेले गल्ती नगरिकन गरेकै हो भन्ने खालको गतिविधि गरेर समस्या सिर्जना गरे त्यो राम्रो नहुने बताए । उनले भने, ‘गल्ती गरेको हो भने अनुसन्धान हुनुपर्छ । तर, गल्ती नगरिकन समस्या सृजना गर्ने काम गर्नु हुन्न।’
माओवादी नेता शक्ति बस्नेतले राजनीतिक आग्रह–पूर्वाग्रका संकेत देखिनु राम्रो नहुने भन्दै कानूनी प्रक्रियाबाट अघि बढ्न कसैले अवरोध नगर्ने बताए ।
