काठमाडौं । काठमाडौं– मुग्लिन सडकखण्डको धादिङमा गएको पहिरोका कारण सडक अवरुद्ध भएको छ । धादिङको जवाङ खोलानजिकै पहिरो जाँदा सडक दुवैतर्फ अवरुद्ध बनेको प्रहरीले जनाएको छ ।
गएराति गएको पहिरो पन्छाएर सडक सुचारु गरे पनि पुनः पहिरो जाँदा दुईतर्फी सडक अवरुद्ध बनेको छ । पहिरो पन्छाउने कार्य भइरहेको प्रहरीले बताएको छ । नागढुंगा–मुग्लिन सडक आयोजनाले दिएको जानकारीअनुसार अहिले पनि पहिरो गइरहेका कारण पूरै पन्छाउन समय लाग्ने देखिएको छ ।
दुईतर्फी सडक अवरुद्ध हुँदा सयौँ सवारीसाधन रोकिएका छन् । काठमाडौं भित्रिने र बाहिरिने मुख्य सडक अवरुद्ध हुँदा यात्रु समस्यामा परेका छन् ।
