काठमाडौं । पछिल्लो तीन घण्टामा चितवन, मकवानपुरका केही स्थानमा मध्यमदेखि भारी वर्षा भएको छ । चितवनका देवघाट, नारायणी फिल्ड कार्यालय, भरतपुर एयरपोर्ट र मकवानपुर एवं आसपासका क्षेत्रमा मध्यमदेखि भारी वर्षा भइरहेको जल तथा मौसम विज्ञान विभागले जनाएको छ ।
उक्त क्षेत्रमा थप वर्षाको पूर्वानुमान छ । खोलाहरूमा आकस्मिक बाढी र कतिपय स्थानमा पहिरोको समेत जोखिम रहने विभागले जनाएको छ । आवश्यक सतर्कता अपनाउन विभागले आग्रह गरेको छ ।
“साउन १८, बिहान ११ः२० बजे । पछिल्लो तीन घण्टामा चितवन जिल्लास्थित नारायणी देवघाट, नारायणी फिल्ड कार्यालय, भरतपुर एयरपोर्ट र मकवानपुर जिल्ला र आसपासका क्षेत्रमा मध्यमदेखि भारी वर्षा भइरहेको तथा थप वर्षा हुने सम्भावना रहेकाले खोलाहरूमा आकस्मिक बहाव बढ्न सक्ने र बाढी, पहिरोको जोखिम रहने भएकाले आवश्यक सतर्कता अपनाइराखौँ,” विभागले भनेको छ ।
कुनै स्थानमा २४ घण्टामा ५० देखि १०० मिलिमिटरसम्म पानी पर्नुलाई ‘भारी’ वर्षा भनिन्छ । १० देखि ५० मिलिमिटरसम्म पानी परे ‘मध्यम’ वर्षा भनिन्छ । १० मिलिमिटरसम्म पानी परे ‘हल्का’ वर्षा भनिने विभागले जनाएको छ ।
