बुटवल । लुम्बिनी प्रदेश सरकारमा नेपाली कांग्रेसका २ र जनता समाजबादी पार्टीका एक गरी ३ जना मन्त्रीले शपथ लिएका छन् ।
मुख्यमन्त्री चेतनारायण आचार्यले नेपाली कांग्रेसका तर्फबाट बर्दियाका जन्मजय तिमिल्सिना र पश्चिम नवलपरासीका देवकरण कलवार तथा जनता समाजवादी पार्टीबाट बाँकेका आदेशकुमार अग्रवाललाई बुधबार मन्त्री नियुक्त गरेका थिए ।
तीनैजना मन्त्रीले बिहीबार प्रदेश प्रमुखको कार्यालय बुटवलमा प्रदेश प्रमुख कृष्णबहादुर घर्तीमगरबाट शपथ लिएका हुन् । तिमिल्सिनालाई सामाजिक विकास, कलवारलाई वन तथा वातावरण र अग्रवाललाई आन्तरिक मामिला तथा कानुन मन्त्रालयको जिम्मेवारी तोकिएको छ ।
१२ मन्त्रालय रहेको लुम्बिनीमा तीनजना मन्त्री थपिएसँगै मन्त्रिमण्डल ११ सदस्यीय भएको छ । मन्त्रीमण्डलमा एमालेबाट मुख्यमन्त्रीसहित ५ र कांग्रेसबाट ५ जना मन्त्री पुगेका छन् । युवा तथा खेलकुद मन्त्रालय मुख्यमन्त्री आचार्यले नै सम्हालेका छन् ।
