काठमाडौं । दक्षिण कोरियामा भएकव् विमान दुर्घटनामा मृत्यु हुनेको संख्या १७९ जना पुगेको छ । विमानमा सवार १८१ जनामध्ये १७९ जनाको मृत्यु भइसकेको अन्तिराष्ट्रिय सञ्चारमाध्यमले जनाएका छन् ।
दुर्घटनामा परेका मध्ये दुई जनाको भग्नावशेषबाट जीवितै उद्दार गरिएको छ । ती दुई जना बाहेक अन्य सबै यात्रुको मृत्यु भइसकेको बताइएको छ । विमान अवतरणका क्रममा धावनमार्गबाट चिप्लिएर दुर्घटना भएको बताइएको ।
धावनमार्गबाट चिप्लिएर दक्षिण पश्चिममा रहेको मुआन अन्तर्राष्ट्रिय विमानस्थलको पर्खालमा ठोक्किएको दक्षिण कोरियाली समाचार एजेन्सीले जनाएको छ ।
विमानको ल्याण्डिङ गियरमा भएको गडबडीले दुर्घटना भएको उल्लेख गरिएको छ र प्रत्यक्षदर्शीका अनुसार विमानमा चरा ठोक्किएर दुर्घटनाग्रस्त भएको पनि भनिएको छ ।
१७५ यात्रु र ६ जना चालक दलका सदस्य बोकेको जेजु एयरको विमान थाइल्याण्डको बैंककबाट फर्किएको थियो । जहाजमा रहेका यात्रुहरूमा १ सय ७३ दक्षिण कोरियाली र दुई जना थाइ नागरिक रहेको योनहाप समाचार एजेन्सीले जनाएको छ ।
